माओवादीको बैठक १७ गतेसम्मलाई स्थगित

काठमाडौ, साउन ११ – 

एकीकृत नेकपा माओवादीको महाधिवेशन आयोजक समितिको बैठक आउँदो १७ गतेसम्म स्थगित भएको छ । बिहीबार बिहान बसेको माओवादी केन्द्रीय कार्यालयको बैठकले राजनीतिक गतिरोध अन्त्यका लागि दलहरुसंग छलफल गर्नुपर्ने भन्दै महाधिवेशन आयोजक समितिको शुक्रवार बस्ने तय भएको बैठक १७ गतेबस्ने निर्णय गरेको उपाध्यक्ष नारायणकाजी श्रेष्ठ प्रकाशले बताउनुभयो ।

उहाँले आउँदो १७ गतेसम्म शिर्ष नेताहरु अनौपचारिक र औपचारिक रुपमा राजनीतिक गतिरोधको अन्त्यका लागि अरुदलसंग छलफलमा जुट्ने बताउनुभयो । त्यस्तै कार्यालयको बैठकले विभिन्न क्षेत्रको कार्यविभाजन गर्ने र बिस्तारित बैठकले गरेका निर्णयहरु पनि १७ गतेसम्म कार्यान्वयन गर्ने निर्णय भएको श्रेष्ठको भनाई छ ।  

बिस्तारित बैठकमा प्रचण्डले गाडी फिर्ता गर्ने, लाजिम्पाटको निवास छाड्ने, सचिवालय परिवर्तन गर्ने लगायतका घोषणा गर्नुभएको थियो । त्यस्तै आर्थिक पारदर्शिताका लागि आर्थिक विभाग र लेखा शाखा मार्फत काम गर्ने घोषणा भएको थियो ।