अन्तर्राष्ट्रिय विमानस्थल निर्माणमा अवरोध भएको भन्दै आन्दोलन घोषणा

पोखरा, साउन
– पोखरामा बन्न लागेको क्षेत्रिय अन्तर्राष्ट्रिय विमानस्थल निर्माणमा अवरोध सृजना गर्न खोजेको भन्दै विमानस्थल निर्माण सरोकार समितिले आन्दोलन घोषणा गरेको छ । निर्माण प्रकृया सुरु हुनै लागेका बेला नागरिक उड्डयन प्राधिकरणका कर्मचारीहरुले नै अवरोध गर्न खोजेको भन्दै समितिले पोखरा विमानस्थल बन्द गर्ने सम्मका कार्यक्रमहरु सार्वजनिक गरेको छ ।

समितिले सरोकारवालहरुसँग काठमाडौं तथा पोखरामा अन्तक्र्रिया, पोखरामा जनप्रर्दन, पोखरा बिमानस्थलमा कालो व्यानर राख्ने, नागरिक उड्डयन प्राधिकरण केन्द्रीय कार्यालय घेराउ गर्ने लगायतका विरोधका कार्यक्रम पनि सार्वजनिक गरेको छ । मागको सुनुवाई नभए पोखरा विमानस्थल बन्द गरिने समिति संयोजक समेत रहेका पोखरा उद्योग वाणिज्य संघका अध्यक्ष कृष्णमोहन श्रेष्ठले जानकारी दिनुभयो ।

निर्माणमा लगानी गर्ने देश चीन तथा नेपाल सरकार सकरात्मक रहेका बेला प्राधिकरणका कर्मचारीहरुले लागत महङ्गो भएको भन्दै विरोध गरेपछि पोखरेलीहरुले विमानस्थल निर्माण प्रकृया रोकिने हो कि भन्ने आशंका गरेका हुन् । विमानस्थल निर्माण उच्चस्तरीय समस्या समाधान समितिका संयोजक पुर्व सभासद राजकाजी गुरुङ्गले कर्मचारीहरुले अवरोध सृजना गर्न खोजे पनि मन्त्रीस्तरीय निर्णय गराएरै भए पनि विमानस्थल निर्माण हुने दाबि गर्नुभएको छ ।

निर्माण प्रकृया रद्ध नगरे आन्दोलनमा उत्रिने यस अघिनै कर्मचारीले चेतावनी दिईसकेका छन् ।

पोखराको छिनेडाँडामा अन्तर्राष्ट्रियय विमानस्थल बनाउन ३७ बर्षअघि नै ३ हजार १ सय ६ रोपनी जग्गा अधिग्रहण गरिएको थियो । प्रस्तावित विमानस्थलमा ४५ मिटर चौडाइ र २ हजार ५ सय मिटर लम्बाइको पक्की धावनमार्ग रहने छ । विमानस्थलमा ठुला २ सय जना यात्रु क्षमता भएका जहाजहरु अवतरण गर्न सक्नेछन् ।