लमजुङमा हलोक्रान्ति दिवस मनाइँदै

आश गुरुङ/ लमजुङ, साउन ११ – 

लमजुङको दुराडाँडा गाउँ विकास समिति वडा नम्बर ६ को अर्चल्यानी बाटेगरामा बिहीबार ६३ औँ हलोक्रान्ति दिवस मनाइँदै छ । हलोक्रान्ति नेपाल तथा तोयानाथ स्मृति प्रतिष्ठान दुराडाँडाको पहलमा हलो क्रान्ति दिवस मनाउन लागिएको हो ।

देशमा प्रजातन्त्रको उदय हुनुअघि अर्थात विक्रम संम्बत २००६ साल साउन ११ गतेका दिन लमजुङको दुराडाँडा ६, अर्चल्यानीमा पण्डित तोयानाथ अधिकारीको अगुवाईमा लेप्टेन शेषकान्त अधिकारी, मुखिया हरिभक्त पौडेल, श्रीकान्त अधिकारी, मायानाथ पौडेल लगायत २७ जना बाहुनहरुले पहिलोपटक सामुहिक रुपमा हलो जोतेका थिए ।

पहिलोपटक ब्राम्हण समुदायका ब्यक्तिहरुले हलो जोतेर क्रान्तिकारी काम गरेको सम्झनामा दुराडाँडाको अर्चल्यानी बाटेगरामा हरेक वर्ष हलोक्रान्ति दिवस मनाउने गरिन्छ ।

राणा सरकारको तानाशाही संस्कारसंगै मौलाएको बाहुनवाद त्यागेर किसानहरुको पक्षमा हलो क्रान्तिको शुरुवात गरेको भन्दै पण्डित तोयानाथ लगायतलाई क्रान्तिकारी घोषणा गर्न स्थानीय वासिन्दाले सरकारसंग माग गर्दै आएका छन् ।

लमजुङको दुराडाँडामा २००६ साल साउन ११ गते बाहुनले हलो जोतेपछि अन्य जिल्लामा पनि यसले ब्यापक रुप लिएको थियो । २००६ सालकै पुसमा तनहुँ, फागुनमा कास्की र धादिङ, २००७ साल वैशाखमा अर्घाखाँची र गोरखा साथै २००८ सालमा स्याङ्जामा पनि हलो जोत्ने अभियान शुरु भएको थियो ।