गूगलका उच्च अधिकारी याहूको सीईओमा नियुक्त

टेक्नोलोजीसम्वन्धी विश्वको ठूलो कम्पनी मध्येको एक याहूले अर्को कम्पनी गूगलका एक प्रमुख अधिकारीलाई नयाँ सीईओ नियुक्त गरेको छ ।

३७ बर्षीया मरिसा मायरलाई नयाँ सीईओमा नियुक्त गरिएको याहूले बताएको छ । याहूको सीईओमा नियुक्त भएपछि मरिसाले भनेकी छिन्-’हामी विश्वभरका शहाम्रा ग्राहक र विज्ञापनदाताको अनुभवलाई अझ राम्रो बनाउन नयाँ नयाँ सेवा ल्याउन र विषयबस्तुमा परिर्वतन ल्याउन कम्पनीका समर्पित कर्मचारीहरुसँग मिलेर काम गर्छु ।’ उनलाई अब छिट्टै याहूको बोर्ड सदस्य बनाइने बताइएको छ ।

मारिसा एक वर्षमा याहूमा तेस्रो सीईओ बनेकी हुन् । तत्कालिन सीईओ स्कट टमसनले आफ्नो अध्ययन प्रमाणपत्र विवादका कारण राजीनामा दिएका थिए । उनीभन्दा अघिका सीईओलाई सेप्टेम्बर २०११ मा हटाइएको थियो । पछिल्लो समय गूगल र फेसबुकका कारण याहूले निकै चुनौति सामना गर्नु परिरहेको छ ।

याहूको समाचार सेवा लोकप्रिय रहेपनि सर्च इन्जिन र इमेल सेवाका प्रयोगकर्ताहरु घट्दो छ । जसका कारण याहूको शेयरको मूल्यमा समेत गिरावट आएको छ ।

को हुन् मारिसा

मारिसा मायरले सन् १९९९ मा गूगलमा पहिलो महिला इन्जिनियरको रुपमा काम सुरु गरेकी थिइन् । क्यालिफोर्नियाको स्टेनफोर्ड विश्वविद्यालयबाट कम्प्युटर साइन्स अध्ययन गरेकी मारिसा सुरुमा गूगलको २० औं कर्मचारी थिइन । गुगलको सर्च इन्जिन र कम्पनीको होम पेज बनाउन उनको महत्वपूर्ण भूमिका छ ।

पछिल्लो दिनमा उनी गूगलको म्यापिङ सेवाका प्रमुख थिइन । मारिसा टोक्नोलोजीसम्वन्धी ठूलो कम्पनीको सीईओ पदमा पुग्ने केही महिला मध्ये एक हुन् ।