आसाममा अझै हिंसा रोकिएन

साउन ११ –

 निरन्तरको प्रयासपछि पनि हिंसा रोक्न नसकेपछि भारतीय सेनाले आसामका गाउँमा खोजतलास अभियान सञ्चालन गरेको छ । केन्द्र सरकारले हिंसा मच्चाउने समूहका नेतालाई गिरफ्तार गर्न निर्देशन दिएपछि सेना र अर्धसैनिक बलको टोलीले हिंसाबाट सबैभन्दा प्रभावित कोकराझार लगायतका जिल्लामा खोजतलास अभियान शुरु गरेको हो ।

स्थितिलाई नियन्त्रणमा लिन ठूलो संख्यामा सेना तैनाथ गरिएको छ । गएको बिहीबार कोकराझार जिल्लामा मुस्लिम समुदायका दुईजना विद्यार्थी नेतामाथि नचिनेको समूहले गोली प्रहार गरेपछि हिंसा मच्चिएको हो । हिंसामा परी अहिले सम्म ४१ जनाको ज्यन गईसकेको छ भने दुईलाख भन्दा बढी विस्थापीत भई विभिन्न शिविरमा शरण लिएर बसेका छन् ।

विस्थापितहरु १ सय २५ वटा शिविरमा बसेका छन् । सरकारले उनीहरुलाई आधारभूत सामाग्री उपलब्ध गराईरहेपनि धेरैजसो मानिस खाद्यान्न र खानेपानीको समस्या झेल्न बाध्य भएको भारतीय सञ्चारमाध्यमले जनाएका छन् । सरकारले हिंसामा जातीय समूहको संलग्नता रहेको बताएको छ । राज्य सरकारले हिंसा भड्काउन खोज्नेलाई देख्ने बित्तिकै गोली हान्न आदेश दिईएको छ ।