बलात्कारी युवाहरु पक्राउ परेनन्

एलबी थापा/उज्यालो । प्यूठान, साउन ३ - एकहप्ताअघि एक महिलालाई सामुहिक बलात्कार गर्ने
प्यूठान खैराका युवाहरु अझै पक्राउ परेका छैनन् । गाउँकी बृद्धा महिलालाई सामुहिक बलात्कार गरी फरार भएका खैरा–४, बेलडाँडाका कालु दमाई, दिपक थापा, भोजु थापा, दीपक बिक, र राजु सोतीलाई प्रहरीले पक्राउ गर्न सकेको छैन ।

पीडित महिलाले ढिला गरी उजुरी दिएको र ३ दिनसम्म फोन सेवा अबरुद्ध हुँदा सम्पर्क र समन्वय हुन नसक्दा फरार बलात्कारीहरुलाई पक्राउ गर्न ढिला भएको प्रहरीले जनाएको छ । बलात्कारमा संलग्न युवालाई पक्राउ गर्न उनीहरुको हुलिया सहित खोजी कार्य र अनुसन्धान जारी रहेको प्यूठान प्रहरी प्रमुख डिएसपी डम्बरबहादुर बिकले बताउनुभयो ।

प्रहरीका अनुसार दिपक थापा र राजु सोती यसभन्दा पहिले स्थानीय युवतिलाई जिस्क्याएको र जबर्जस्ती करणी उद्योगको उजुरी प्रहरीमा परेको थियो । आफूलाई जबर्जस्ती करणी गरेपछि गाउँबाट भागेका उनीहरुले बारम्बार फोन गरी कसैलाई पनि नभन्न धम्की दिएपछि न्याय खोज्दै प्रहरीकोमा आएको पीडित महिलाले बताएकी छन् ।

पीडित महिलाका अनुसार बलात्कार गर्ने युवाहरुले घटनावारे कसैलाई नभन्न र भनेमा मारीदिने धम्की दिएका छन् । पीडित महिलालाई अहिले जिल्लामा महिला संरक्षण गृहमा राखिएको छ ।