एड्सको उपचारमा महत्वपूर्ण प्रगति

साउन ११ – बैज्ञानिकहरुले एड्स फैलाउने एचआईभी भाइरस नष्ट गर्ने दिशामा महत्वपूर्ण उपलब्धि हासिल गरेको दावी गरेका छन् । एचआईभी भाईरस मानिसको शरीरमा बिना कुनै प्रतिक्रिया लामो समय रहिरहने हुँदा त्यसको उपचारमा कठिनाई हुँदै आएको छ ।

त्यस्ता सुस्त अवस्थामा रहेका भाईरसलाई क्यान्सरको उपचारमा प्रयोग हुने औषधीको प्रयोगबाटै बाहिर निकाल्न सकिने वैज्ञानिकहरुको दावी छ । उनीहरुले विभिन्न आठ वटा प्रयोगमा एचआईभी भाइरसमाथि आक्रमण गरी सामान्य एन्टी रेट्रो भाईरल औषधीले त्यस्ता भाईरस नष्ट गरेका थिए ।

एचआईभी भाईरस मानिसको जीनसंग गाँसिने र प्रतिरक्षा प्रणालीमा लुकेर बस्ने भएकाले उपचारमा समस्या भएको वैज्ञानिकहरुले बताउँदै आएका छन् । अनुसन्धानमा संलग्न बेलायतको अक्सफोर्ड विश्वविद्यालयका जोन फ्रेटरका अनुसार जब एचआईभी भाईरस सक्रिय हुँदैन तबसम्म विश्वमा उपलब्ध कुनै पनि औषधीले त्यसका विरुद्ध काम गर्दैन भने जब सक्रिय हुन्छ त्यसपछि भाईरसमाथि नियन्त्रण गर्नै असम्भव हुन्छ ।

तर पछिल्लो अनुसन्धानले निष्क्रिय अवस्थामा रहेको एचआईभी भाईरसमाथि नियन्त्रण गर्न सकिने संभावना देखिएकाले एचआईभी एड्सको उपचारका दिशामा यो महत्वपूर्ण उपलब्धि हुने उहाँको विश्वास छ । वैज्ञानिकहरुले एचआईभी एड्सको प्रभावकारी औषधिका रुपमा विकसित गर्न भने अझै धेरै वर्ष अनुसन्धान गर्नु जरुरी रहेको बताएका छन् ।