एपिएफ महिला फुटबलको फाइनलमा

रौतहट, साउन 

शसस्त्र प्रहरीको एपिएफ क्लव राष्ट्रिय महिला फुटबल प्रतियोगिता २०६९ को फाइनलमा पुगेको छ । रौतहटको चन्द्रनिगाहपुरमा वुधवार सम्पन्न कैलालीलाई शुन्यको बिरुद्ध ४ गोलले पराजित गरी एपिएफ फाईनलमा पुगेको हो । शसस्त्र प्रहरी बल महिला टिमको तर्फबाट जर्सी नं. ७ की जमुना गुरुङ्गले पहिलो हाफको इन्जुरी समयमा र ८३ औं मिनेटमा गरी २ गोल गरिन् ।

यस्तै अनु लामाले ५२ औं र प्रमिला राईले ५७ औं मिनेटमा एक एक गोल थपे । एपिएफले उपाधिका लाग नेपाल पुलिस र नेपाल आर्मी क्लवबीच विहीबार हुने खेलको विजेतासित प्रतिस्पर्धा गर्ने छ । पुलिस र आर्मीबीचको खेल विहीवार दिउँसो ४ बजे बाराको सिमरामा हुने छ ।

प्रतियोगितामा प्रथम हुने टिमलाई नगद तीन लाख रुपैया द्धितिय हुने टिमलाई एक लाख पचास हजार रुपैंया र सेमिफाईनल खेल्ने दुबै टिमलाई पचास–पचास हजार रुपैया पुरस्कार प्रदान गरिनेछ भने प्रतियोगितामा उत्कृष्ट गोल किपर, डिफेन्स, मिडफिल्ड र फरवार्ड तथा प्रशिक्षकलाई जनही पचास हजार रुपैया र प्रतियोगिताको सबै भन्दा उत्कृष्ट खेलाडीलाई स्कुटी प्रदान गरिनेछ ।