आजदेखि इन्डो नेपाल सोतोकान कराँते सुरु हुँदै

२९ असार, काठमाण्डौं । चौथो इन्डो- नेपाल सोतोकान कराँते प्रतियोगिता शुक्रबारदेखि राजधानीमा सुरु हुँदैछ । नेपाल सोतोकान कराँते संघले आयोजना गर्न लागेको प्रतियोगितामा ४ सय खेलाडीको सहभागिता रहने आयोजकले जनाएका छन् ।

प्रतियोगितामा नेपालका विभिन्न २७ जिल्लाका ३ सय खेलाडीले भाग लिने बताइएको छ । त्यस्तै भारतको नयाँ दिल्ली, मुम्बई, चेन्नई, कोलकाता, बिहार तथा असम राइफल (भारतीय सेना) बाट १ सय खेलाडीले प्रतिस्पर्धा गर्ने बताईएको छ ।

दुईदिने प्रतियोगितामा ४५ स्वर्णका लागि प्रतिस्पर्धा हुनेछ । प्रतियोगिताका सम्पूर्ण खेल त्रिपुरेश्वरस्थित राष्ट्रिय खेलकुद परिषद्को कभर्डहलमा हुनेछ ।